طارق مدكور يوضح سبب ابتعاده عن ألبوم عمرو الجديد .....

أثارت الاخبار الاخيرة عن تبتعاد الموزع الكبير طارق مدكور عن الالبوم الجديد للفنان عمرو دياب الكثير من التساؤلات لهذا قام لموزع الاشهر في الوطن العربي بالرد على هذه التساؤلات على موقعه الخاص


- الأخبار الأخيرة كانت مفاجأة لجمهور الفنان عمرو دياب، وكالعادة أثارت زوبعة من التساؤلات.

- اللي حصل أني كنت مفروض أبتدي الشغل مع عمرو دياب من بعد لما يرجع من سفريته في راس السنة يوم 15 يناير، اللي حصل انه رجع فعلا يوم 15 وقعدنا سيشن أو اتنين وابتدينا نفكر هنعمل ايه في الألبوم. في الوقت ده شركة روتانا كلمت عمرو دياب واستعجلته على نزول الألبوم وقالتله قدامك شهر عشان تخلصه، طبعا انا في الشهر ده لايمكن اكون عملت حاجة، فقلتله يا عمرو انا مقدرش اشتغل ومقدرش اعمل حاجة ليها معنى في شهر واحد، وخصوصا ان ألبوم عمرو دياب حاجة مهمة بالنسبالي، وبحط فيه أفكار متنوعة ورسالة أو فكرة معينة بنعملها انا وعمرو في الألبوم، وكمان أنا عندي التزامات واتفاقات تانية ومقدرش اعتذر أو أأجل مطربين تانيين.


- طيب ليه أعلنت دلوقتي بدل يناير أو فبراير؟

- طبيعي أي عمل بيبقى ليه كواليس وتفاصيل مش لازم الجمهور يبقى عارفها، بس وصلتني رسايل كتير بتسأل عن ألبوم عمرو.


- يعني مكنش فيه خلاف أو عدم تقارب في وجهات النظر؟

- لا اطلاقا، إحنا أصلنا معلمناش ولا أغنية للأسف، بسبب ان عمرو غير اتجاهه كذا مرة، وضغط شركة روتانا المستمر.


- وايه رأيك في رد فعل جمهور عمرو؟

- لو هما بيحبو عمرو بجد لازم يثقوا فيه، يعني انا شفت ناس زعلت من تأخير الألبوم، يعني انا أزعل من واحد بيتعب نفسه عشان يسمعني حاجة حلوة و بيقضي عمره كله في أنه يعمل ألبوم انتو تتبسطوا منه وتحبوه؟ ولا أزعل من واحد "بيكروت" الألبوم عشان ينزل وخلاص؟ فاذا كان فيه تأخير فهو لأنه عايز يعمل حاجة ترضيه و يرضي بيها جمهوره حتى لو قعد سنتين و تلاتة، وده الفنان الصح اللي بيحترم جمهوره وفنه، سواءا بيشتغل معايا أو مع غيري، وانا ملاحظ ان جمهور عمرو دياب شايف أن الموضوع كله بينحصر في الموزع، ان فلان مشي وفلان جه تبقى الدنيا راحت والدنيا جت، الموزع ده ضلع من مربع (المطرب، الشاعر، الملحن، الموزع)، مفيش اي فرد من دول مسؤوول لوحده عن الأغنية أو الألبوم، فكل واحد ليه دور بيعمله، عمرو كمان مش بس بيغني والسلام، عمرو ليه شخصية صوته وطريقة ادائه المختلفة، وكل ألبوم بيبقى عايز يقدم شكل جديد و يغني بطريقة جديدة.


- وهل لمست ده في الرسايل اللي وصلتك؟

- اللي بلاحظه دايما انهم عايزين الألبوم ينزل، طيب عايزنه حلو ولا عايزينه اي ألبوم وخلاص؟ لو عايزينه حلو أكيد عمرو كمان نفسه يشوف نتيجة تعبه وسهره ومجهوده، و هو أكيد مش مخلص الألبوم وقاعد يتفرج على التلفزيون، فطالما هو متأخر يبقى أكيد متأخر عشان حاجة أحسن